Poštovaoci nekadašnjeg predsjednika Socijalističke Federativne Republike Jugoslavije (SFRJ) Josipa Broza Tita iz skoro svih bivših jugoslovenskih republika od jutros dolaze u Kuću cvijeća, u kojoj je sahranjen prije 31 godinu. Josip Broz je umro na današnji dan 1980. godine u Kliničko-bolničkom centru u Ljubljani, a četiri dana kasnije sahranjen je u Beogradu u Kući cvijeća u koju svake godine, na godišnjicu njegove smrti, dolaze članovi njegove porodice i simpatizeri iz svih krajeva bivše Jugoslavije.

I ove godine njegova supruga Jovanka poslala je cvijeće.

Među posjetiocima su u najvećem broju stariji ljudi, poštovaoci Josipa Broza, ali ima i mladih.

Kuća cvijeća otvorena je danas za posjete od 10.00 do 18.00 časova, a ulaz je besplatan, kao i za Muzej “25. maj”.

Tito je sahranjen u Kući cvijeća po sopstvenoj želji. Na njegovu sahranu došlo je 700 000 ljudi i 209 državnih delegacija iz 128 zemalja svijeta i bio je to najposjećeniji pogreb nekog državnika u 20. vijeku.

Posljednju poštu Josipu Brozu, koji je bio i jedan od osnivača Pokreta nesvrstanih, tada je odao 31 šef država, 22 premijera, četiri kralja, šest prinčeva, 11 predsjednika skupština… Iz svijeta, podijeljenog po hladnoratovskim linijama, došli su državnici iz oba tabora.

Od 1980. godine Kuću cvijeća posjetilo je više od 17 miliona ljudi.